– أولا لازم نفهم ان قواعد شركات الطيران ان أي حقائب سفر وزنها لا يزيد عن 23 كيلو يعني مصر للطيران وزن مسموح ليك فيه 46 كيلو مقسمين علي حقيبتين, ورسمي كل حقيبة سفر 23 كيلو.
يعني ما تحطش حقيبة 30 كيلو وحقيبة 16 كيلو، لو حصل كده ممكن بقى غلاسه منهم يخلوك تركن على جنب وتفتح حقائب السفر جوه المطار وتقعد تنقل منها حاجات علشان تقلل وزنها او تحطهم في أكياس ودي مصيبه في حد ذاتها.
-ثانيا بقى تجهيز حقيبة السفر، بنبدأ بأول خطوه لازم نجهز احنا حناخد ايه معانا وطبعا ده يكون علي أساس منطقي يعني لو احنا مسافريين 5 أيام يبقي ناخد لبس 5 أيام.
طيب في اليوم الواحد ايه اللي بيتغير يا قميص يا تي شيرت يعني للرجاله ناخد مثلا بنطلون جينز واحد وواحد تاني مسافرين بيه, و5 قمصان و3 تيشرتات ما نخدش لبس كثير مش هيتلبس.
ولو احنا مسافريين وهنعمل شوبينج يبقي نقلل العدد ده لأننا هنشتري من هناك لبس فممكن نلبس من اللي هنشتريه.
وبالتالي نوفر في مكان الشنطه اللبس اللي هناخده, ويفضل نعمل قائمه بالحاجات اللي حناخدها من قبليها باسبوع وكل يوم نفتكر حاجه نضيفها علي القائمه بتاعتنا, وقبل السفر بيوم نبدأ بتجهيز حقائب السفر بناء علي القائمه اللي في ايدنا.
-ثالثا جينا بقى وقت تحضير الشنطة وده التحدي الكبير، أول شيء نطبق كل اللبس بطريقة سليمة يعني زي بتاع المكوه، نقفل كل زراير القميص ونطبقه صح ونبدأ بوضع الأحذية في قاع الشنطة.
نحط جوه الاحذيه الشرابات وطبعا لازم تاخدوا حذاء واحد لانه بيوزن كثير، والحذاء التاني انت مسافر بيه ويفضل حذاء رياضي أو خفيف للمشي طبعا لأننا بنمشي كتير فحت.
فوق الأحذيه نحط الحاجات التقيله اللي مش ببتركمش زي الجينز والبلوفرات ولبس النوم والحاجات اللي مش بتتكرمش بسهوله ونحطها جنب بعض وما نسيبش مسافات.
يجي بقى فوقهم التيشرتات واللبس اللي بيتكرمش, وفوق خالص البليزرات أو البدل أو السويترات أو الجواكت ودي بتكون مفرده بطول الشنطه.
– رابعا بقى لازم نحط كل أدوات الميك أب والسوائل والبرفانات والدبابيس والمقص والجيل والكريمات وأي آلات حادة في حقائب سفر دي مناخدهاش علي الطيارة لأنها ممنوع.
وبالتالي توزعي الحاجات دي بين الهدوم وتكون حاططهم في أكياس مقفولة كويس ودايما بقى الحزام والرفايع يتسابوا بره وتحطهم آخر حاجة ما بين الفراغات في الشنطة.
– خامسا مسموح لك بشنطه صغيره على الطياره ما بين 8 و10 كيلو، الشنطة دي بقى حنحط فيها كل البلاوي اللي بتاخد وزن زي مثلا الشيكولاتات لأننا بنجيبها واحنا راجعين.
لو فيه كاجو او فستق او اكل بيوزن كثير ولو جزمه او سيفتي بتوزن وبتاخد مكان في الشنطه الرئيسيه يعني تقللها علي قد ما تقدر علشان توفر في وزن الشنطه الرئيسية.
بس فيه بقى مشكله ان الشنطه دي ما بتطلعش الطياره مع الشنط الرئيسيه فحتفضل شايلها في المطار, ولو فيه ترانزيت معاك برضه.
– لو معاك بقى لعب أطفال افضل تحطها في كيس كبير وتاخدها على الطياره لانها بتاخد مساحه رهيبه لان العلب بتاعتها بتكون كبيره وطبعا بتتكسر بسهوله فشيليها معاك وهي أصلا خفيفه الوزن.
العربية
